Mogadishu (SP) - Banaan bax looga soo horjeedo Ururka Xisbul Islaam ayaa barqanimadii maanta ka dhacay Degmada Wardhiigley, iyadoo banaan baxaas ay isugu soo baxeen dadweyne careysan oo isugu jiray Rag iyo dumar.

Banaan baxayaasha ayaa taayaro ku gubay Xaafada Xararyaale, iyagoona dhagxaan ku weeraray Saldhiga Booliska degmada Wardhiigley oo ay ku sugan yihiin Ciidamada Xisbul Islaam.

Mid ka mid ah dadka deegaanka ayaa sheegay in dadweynaha ku nool Xaafada Xararyaale ay ka caroodeen Haween ay kufsadeen Ciidamo ka tirsan Xisbul Islaam, taasoo la sheegay in ay ka dhiidhiyeen.

Saraakiil ka tirsan Xisbul Islaam ayaa xaqiijiyay banaan baxa, hase ahaatee waxay dhab ahaan ka gaabsadeen qaabka uu u dhacay iyo waxa looga soo horjeeday, waxaana laga maqlayay Xaafada Xararyaale rasaas u muuqatay mid lagu kala erinayay dadkii banaan baxa isugu yimid.

Banaan baxan ayaa noqonayaa kii u horeeyay oo dadka reer Muqdisho ku muujiyaan cabashadooda, isla markaana si dhiiranaan ku jirta uga hor yimaadaan kooxaha ka soo horjeeda dowladda oo falal cabsi gelin ku haya shacabka.

C/risaaq C/laahi

Indhajaceyl

Sanaagpost News Desk