China (SP) - Adduunyada waa Cajiib, oo intaad ku dul-nooshahay waxa aad arkaysaa Dhacdooyin aad iyo aad kuu xiisa geliya, kuwa kaa yaabiya, kuwo farxad iyo reyn reyn xambaarsan iyo waliba kuwo aan Maskaxda Aadanaha u wanaagsaneyn oo murugo iyo uur-kutaallo daran wata.

Hadaba waxaanu maqalnaa in Xayawaanada qaar ay noolaha kale ee Aadanaha oo kale u noolaan karaan, oo hadii la xanaaneeyo, islamarkaana tababar halaasi ah la siiyo ay fududahay fahamka Xayawaanada qaar ee Duur-joogta ah iyo kuwa Dab-jooga ah.

Wadanka Shiinaha, oo ka mid ah dalalka ugu mucjisada badan marka loo eego dhacdooyinka la yaabka leh ee aalaaba ka dhaca wadankaasi, ayaa Todobaadkan waxaa lagu qabtay tartan xagga Fardaha ah oo ay ka qeyb qaadanayaan Xayawaanada la tabatari karo sida Libaaxa, Shabeelka, Haramcadka, Bisadaha waaweyn ee Dab-jooga ah ama guryaha lagu xanaaneeyo iyo kuwo kale oo dalalka fog ee adduunka sida Australia iyo New Zealand laga soo daabulay.

Waa wax aan marnaba cid ku fakeri karta aan jirin oo ay yar tahay in Maskaxdaada aad ka dhaadhiciso in Habar-dugaag oo cadow ku ah Noolaha kale ee la dhaqdo hadana inta la tababaray tartan loo qabto, waxaana kaasii yaabinaya in Libaax ama Shabeel Faras kaxaynaya aad aragto.

Kumanaan daawadayaal ah ayaa ka xaadiray Xerada Xiamen oo ku taalla Magaalada Fujian ee dhacda Koonfur-galbeed ee dalkaasi Shiinaha, halkaasi oo tartan-xayawaaneed aad u xiisa badan lagu qabtay, iyadoo daawadayaashu si aad ah ula dhaceen sida habsamida leh ee mid ka mid ah Libaaxyo tartanka ka qeyb qaadanayey uu Leejaanka ama hogaanka Faraska uu ilkihiisa ku qabtay, deedna uu sida Bani’aadanka dhawaq foori u muuqda iyo Kelli ka taabasho ku bilaabay Faraska, taasi oo horseeday in Faraskaasi uu Xiin iyo Boodo dheer ka dib masaafo aad u fog kaga hormaro Fardihii kale.

Jariiradda Mail-Online ee kasoo baxda dalka Britain oo soo xiganaysa qaar ka mid ah macalimiinta Chinees-ka ah ee soo agaasimay tartankan Xayawaanaadka ah, ayaa sidoo kale ku warantay inay xeradaasi cayaaraha Fardaha ay wacdaro ka muujiyeen Shabeel iyo Haramcad muddo 5-sano ah loo tababarayey wadida Fardaha.

Libaaxa (Lion) oo ah Boqorka Habar-dugaag, Shabeelka iyo Maroodiga oo ah Xayawaanada ugu khatarsan, ayaa ka mid ah Xayawaanada sida joogtada ah ay u dhaqdaan Dadyowga ku nool wadanka Shiinaha oo ah dalka ugu Dadka badan Caalamka ahna barta ugu mucjisada badan Adduunka, marka loo eego dhacdooyinka cajaa’ibka ah ee uu ku caan baxeen shacabka dalkaasi.

Wararka Somalia & Saadaasha Xigta Kala Soco Sanaagpost.

C/risaaq C/laahi Maxamed (Indhojaceyl)

Indhojaceel2003@hotmail.com

Sanaagpost News Desk

1 Comment(s)