Geeddi wuxu lahaa hal "Baarcad" la odhan jirey oo loogu xuddun xidhay isla markii uu dhashay, Wiilku hashiisa aad buu u jeclaa had iyo jeerna wuu u geeddo gurri jirrey, hashuna markay indhaha ku qabbato ayey u soo olloli jirtey, Oo u imman jirtey, Markay u timaaddo, Wuxuu had iyo goor afka u geliyaa xaqal caws ah oo uu u soo gurrey. 

Maalin maalmaha ka mid ah ayaa Geeddi oo nin karti badan ahaa aabbihii dhaan u dhiibay, Maalinta Geeddi waxa raacay wiil kurrey ahaa oo ay Geeddi Walaalo ahaayee, Baar-cad markii ay Geeddi tawday bay ollol af-labadii awatey daaqna ka soontay, Wuxuu maalintii oo dhan weeteeyoba goor duhur ah buu wiilkii is-yidhi gurigii u soo biyo doono.

Intii aanu ka libdhinba intay caggaha laabatay ayey duurka xushay, Wiilkii markii uu Baar-cad tabey baaddi-doon dhawna ku soo waayey ayuu geellii intiisii kale carraabiyey, Markiiba Geeddi iyo aabbihiiba waxay ka war-heleen in ay hashii Baar-cad maqan tahay, Waxay weysada u biyeysteen baaddi-doon hor leh, Illaa iyo caweys dambeedkii markii ay goobayeen waxay bay farro madhnaan la soo noqdeen.

Arroortii dambe ayey haddana raacdo kale cusboonaysiiyeen waxay doon-doonaanba goor barqo ahayd bay raqdii hasha isa soo dul-taageen, Harreeraha inay u raad-gooyeen bay Libaaxii hashii Baar-cad barruurteedii dharqaday raadkiisii arkeen, "Illaahay waxaan ugu nidar-galay in aynaan libaaxyohow ifka ku wada noolaan". Ayuu intuu qammuunaystay yidhi. "Waar inna-keen naftaada ha halligine, Baar-cad kuu soo noqon mayso'e" ayuu aabbihii intuu dhaqaaqay Geeddi ku yidhi. 

Geeddi markii gurrigii uu caanno ku dhammay ayuu warankiisii dhegta u riddey oo aabbihii oo aan arkeen goobtii Baar-cad tiil ku toosay, Geed raqda u dhawaa buunna dhallada uga baxay, si uu libaaxii Baar-cad diley uu ku gaaddo, Libaaxii wuxuu laqanyadii hadh-subaxeedkii la jiifaba duhur markii ay ahayd buu u soo rakaad doontay, Libaaxii markii uu raqdii hashii Baar-cad jilbaha dhigay ayuu Geeddi intuu warrankiisii la soo gaaday kala bogtey kellida middig.

Libaaxii markii uu booddey buu labba tallaabo markii uu qaaday af-weynta goostay. Geeddi libaaxii oo naf-la-caarrid ah ayuu warrankiisii ayuu ka soo gooyey dabadeedna mar labaad ayuu dalqada ka geliyey, 

Libaaxii markii uu naf-baxay, ayuu saantii libaaxa madaxa uu soo ritay oo gurigiisii kula soo dheelmaday, Ayaamo yar markii la joogey ayuu nin Gaalla oo degmada socdaal ku marrayey saantii uu Geeddi haystay ka war-helay, Geeddi saantii waxa laga siistay lacag uu Qaallin geel ah oo hashiisii uga mag-dhawday siistay, Qaalintii markii ay curatay waxay la baxday "MAANDEEQ"

 Qalinkii. Khaliif Ismaaciil Raage

 Ururintii Cabdillaahi Ciyoon/Saudi-Arabia, Riyaad  

 E-mail: amjama_jama@yahoo.com

Tafatiridii iyo Daabacadii  

 Abdirshiid Yusuf Jibril

 Sanaagpost News Desk

 Ku soo dir fikirkaaga E-mail sanaagpost@hotmail.com ama Webmaster@sanaagpost.com